НЭГ ЭЭЛЖТЭЙ ЕБС-ИЙН СУРГАЛТ, ХҮҮХЭД ХӨГЖҮҮЛЭХ БҮТЭЭЛЧ ҮЙЛ АЖИЛЛАГААНЫ ЖИШИГ ТӨЛӨВЛӨЛТ”-ИЙГ ТУРШИХ ТУРШИЛТЫН СУДАЛГАА ЭХЭЛЛЭЭ.

2026 оны 3 дугаар сарын 30-ны өдрөөс 4 дүгээр сарын 08-ны өдрийн хооронд Архангай, Завхан, Баянхонгор, Говь-Алтай, Хэнтий, Дорнод, Дундговь, Өмнөговь, Сэлэнгэ аймгийн нэг ээлжээр хичээллэдэг нийт 13 сургууль дээр “Нэг ээлжтэй ЕБС-ийн сургалт, хүүхэд хөгжүүлэх бүтээлч үйл ажиллагааны жишиг төлөвлөлт”-ийг танилцуулж, турших ажлыг эхлүүллээ. Туршилт судалгааны хүрээнд дээрх сургуулиуд дээр зохион байгуулагдаж буй хичээлээс гадуурх үйл ажиллагааны өнөөгийн нөхцөл байдлыг тодорхойлох зорилгоор багш удирдах ажилтнуудтай ярилцлагын аргаар гарааны судалгааны мэдээлэл цуглууллаа.

Судалгаанд оролцогч талуудаас дараах саналыг өгч байлаа. Тухайлбал,

1. Орон нутгийн сургуулиуд сурагчдын хөгжлийг дэмжих зорилгоор спорт (волейбол, сагсан бөмбөг, бөх), урлаг (зураг, наамал, гар урлал), хөгжим (морин хуур, найрал дуу, бүжиг) болон танин мэдэхүйн (IQ, англи хэл, шатар) чиглэлийн олон төрлийн дугуйлан, секцийг тогтмол зохион байгуулж байна. Эдгээр үйл ажиллагаа нь сурагчдын багаар ажиллах, өөрийгөө илэрхийлэх, тэсвэр хатуужил суух зэрэг хувь хүний төлөвшил болон бүтээлч сэтгэлгээг цогцоор нь хөгжүүлэхэд чухал үүрэг гүйцэтгэж байна.

2. Судалгаанд хамрагдсан сургуулиуд суралцагчдын сонирхол, хэрэгцээний судалгааг хийж, үр дүнд тулгуурлан үйл ажиллагаагаа төлөвлөдөг ч сум, орон нутгийн мэргэжлийн өндөр чадвартай хүний болон материаллаг нөөц дутмаг байгаагаас үүдэж зарим төрлийн хөгжүүлэх үйл ажиллагааг зохион байгуулж чаддаггүй.

3. Боловсролын нэгдсэн цахим дэлгүүрт цаас, бичгийн хэрэгсэл байхаас хичээлээс гадуурх хөгжүүлэх үйл ажиллагаа зохион байгуулахад шаардлагатай хэрэглэгдэхүүн төдийлөн байдаггүй.

4. Багш нарт сургалт, хүүхэд хөгжүүлэх үйл ажиллагаа нь ачаалал үүсгэдэггүй харин бусад байгууллага, сум орон нутгаас зохион байгуулж буй арга хэмжээ, үйл ажиллагаанууд маш их ачаалал үүсгэдэг байна.

5. Хичээлээс гадуурх ажлын чанарыг сайжруулахад салбар хоорондын үйл ажиллагааны уялдаа холбоог анхаарах, багш нарын үнэлэмж, урамшууллыг нэмэгдүүлэх, материаллаг бааз, зориулалтын кабинеттай болох болон үндэсний хэмжээнд нэгдсэн зохицуулалт, санхүүжилтийг шийдвэрлэх шаардлагатай байна.