ЕРӨНХИЙ БОЛОВСРОЛЫН СУРГАЛТЫН ХӨТӨЛБӨРИЙН ХЭРЭГЖИЛТ, ТҮҮНД НӨЛӨӨЛЖ БУЙ ХҮЧИН ЗҮЙЛ

Боловсролын тухай багц хууль 2002 онд гарснаас хойш ерөнхий боловсролын сургалтын хөтөлбөр хэд хэдэн удаа өөрчлөгдөж, эдгээр өөрчлөлт нь боловсролын асуудал хариуцсан төрийн захиргааны төв байгууллагад олгосон эрх хэмжээний хүрээнд гарсан тушаал шийдвэрээр хэрэгжсэн байна.

Дурдсан хугацаанаас хойшхи эхний өөрчлөлтийг нь 2004-2006 хийсэн байна. Мөн 2002 онд БСШУ-ны сайдын А/202 дугаар тушаалаар “Бага, дунд боловсролын киррикюлим болон стандартыг шинэчлэн хөгжүүлэх үзэл баримтлал”-ыг баталсан нь сургалтын хөтөлбөрийг дахин боловсронгуй болгох үндэслэл болжээ. Энэхүү үзэл баримтлалын дагуу Боловсролын Хүрээлэнгээс “ЕБС-ийн агуулгын үлгэрчилсэн хүрээ”-г 2004-2006 онд боловсруулсан байна.

Сургалтын хөтөлбөрийн дараагийн өөрчлөлт нь 2006 онд ерөнхий боловсрол 11 жилийн боловсролын тогтолцоонд шилжсэнтэй холбоотойгоор хийгдсэн бөгөөд Боловсролын хүрээлэнгийн захирлын 15 дугаар тушаалаар 11 жилийн сургуульд судлах хичээлүүд болон тэдгээрийн агуулгын хүрээг боловсролын стандартын айн хүрээнд үлгэрчилсэн байдлаар боловсруулж хэрэгжүүлжээ. Эдгээр сургалтын хөтөлбөрийг боловсруулахад 2004 онд батлагдсан боловсролын стандарт чиг баримжаа болсон бөгөөд уг стандартад цогц чадамжийг ”Хүний эзэмшсэн мэдлэг, чадвар, туршлага, төлөвшсөн хандлага, зан үйлийн илэрхийлэл, хүний хөгжлийн чадамж”, харин танин мэдэхүйн түвшний шалгуурыг “Агуулгын ай бүрээр суралцагчдын эзэмших цогц чадамжийг үнэлэх тодорхой мэдлэг, чадварыг танин мэдэхүйн түвшин бүрт харгалзуулан тодорхойлсон жишиг” гэж тодорхойлжээ.

Гурав дахь өөрчлөлт нь 2006 оноос эхэлсэн байх бөгөөд энэ нь ерөнхий боловсролын 12 жилийн сургалтад шилжих шийдвэр гарсантай холбоотой. 2008 онд 12 жилийн бүрэн дунд боловсролын тогтолцоонд шилжиж, сургалтын агуулгыг хүрэх үр дүнгээр тодорхойлж, арга зүй, үнэлгээний шалгуур үзүүлэлтүүдийг боловсруулан өмнөх сургалтын хөтөлбөрийг үргэлжлүүлэн хэрэгжүүлэх уялдаатай байдал, залгамж холбоог хангасан үндэсний 12 жилийн сургалтын хөтөлбөрийг боловсруулж, практикт нэвтрүүлсэн байна.