БОЛОВСРОЛЫН САЛБАРЫН ХӨГЖЛИЙН ДУНД ХУГАЦААНЫ ТӨЛӨВЛӨГӨӨ (2021-2030)-НИЙ ХЭРЭГЖИЛТИЙН ЯВЦЫН СУДАЛГААНЫ ТАЙЛАН

Монгол Улсын боловсролын салбарын хөгжлийн дунд хугацааны төлөвлөгөөг боловсролын салбарын төрийн болон төрийн бус өмчийн байгууллага, мэргэжлийн байгууллага, салбарын эрдэмтэн судлаач, багш нарын өргөн бүрэлдэхүүн бүхий баг “Алсын хараа-2050” Монгол Улсын урт хугацааны хөгжлийн бодлого, холбогдох хууль, бодлогын бусад баримт бичигтэй нийцүүлэн боловсруулж Монгол Улсын боловсролын салбарын хөгжлийн дунд хугацааны төлөвлөгөө (2021-2030)-г БСШУ-ын сайдын 2020 оны 10 дугаар сарын 09 ны өдрийн А/29 тушаалаар баталснаар хэрэгжүүлж эхэлсэн.

Боловсролын салбарын хөгжлийн дунд хугацааны төлөвлөгөө (2021-2030)-ний зорилго нь “Монгол Улсын иргэний хөгжлийн хэрэгцээг хангахуйц чанартай, нээлттэй, тэгш хүртээмжтэй, уян хатан боловсролын үйлчилгээнд тулгуурлан мэдлэгт суурилсан нийгэм болон дижитал технологийн эринд ажиллаж амьдрах нийгмийн идэвхтэй оролцоо бүхий, тасралтгүй хөгжих чадамжтай иргэнийг цогцоор нь хөгжүүлэх” юм.

Монгол улсын Засгийн газрын 2020-2024 оны үйл ажиллагааны хөтөлбөр болон түүнийг хөтөлбөрийг хэрэгжүүлэх арга хэмжээний төлөвлөгөөг Засгийн газрын 2020 оны 12 дугаар сарын 09-ний өдрийн 203 дугаар тогтоолоор баталсан бөгөөд төлөвлөгөө нь 6 бодлого, 259 зорилтын хүрээнд хэрэгжүүлэх 1087 арга хэмжээг хэрэгжүүлэхээр төлөвлөсөн. Энэ үйл ажиллагааны хөтөлбөрт боловсролын салбарт “Монгол Улсын боловсролын салбарын хөгжлийн дунд хугацааны төлөвлөгөө”- нд тусгагдсан зорилт, хөтөлбөр арга хэмжээг үе шаттайгаа хэрэгжүүлэхээр төлөвлөгдсөн.

Монгол Улсын боловсролын салбарын хөгжлийн дунд хугацааны төлөвлөгөөний хэрэгжилтэд хийсэн судалгааг Монгол Улсын Засгийн газрын үйл ажиллагааны хөтөлбөрт тусган боловсролын салбарт ажлын тайланг үндэслэн хийлээ.

Засгийн газрын 2020 оны 206 дугаар тогтоолоор баталсан “Бодлогын баримт бичгийн хэрэгжилт, захиргааны байгууллагын үйл ажиллагаанд хяналт-шинжилгээ, үнэлгээ хийх нийтлэг журам”-ын 6.2.1-т заасан аргачлалаар, тоо болон чанараар илэрхийлэх боломжгүй тохиолдолд журмын 6.2.2-т заасан аргачлалаар хяналт-шинжилгээ, үнэлгээ хийсэн болно.