"АЛБУС" СУДАЛГААНЫ ТӨСЛИЙН ХҮРЭЭНД ТУРШИЛТ-СУДАЛГАА ХЭРЭГЖҮҮЛЭВ.

Google for Education компанийн албан ёсны түнш iCORE Mongolia, Боловсролын яам, Боловсролын ерөнхий газар хамтран хэрэгжүүлсэн "Албус" судалгааны төслийн хүрээнд Боловсролын судалгааны үндэсний хүрээлэнгийн судалгааны баг нь МУБИС-ийн харьяа ерөнхий боловсролын сургуульд 2024 оны 11 дүгээр сараас эхлэн 3.5 сарын хугацаанд туршилт судалгаа хэрэгжүүлэв. Google-н боловсролын бүтээгдэхүүнийг хичээл, сургалтад ашиглах нь багшлахуй болон суралцахуйд нөлөөлж байгаа эсэхийг илрүүлэх зорилго бүхий уг судалгаанд дээрх сургуулийн 7 дугаар ангийн туршилтын болон хяналтын нэг нэг бүлэг сонгон тоон болон чанарын аргуудыг ашиглаж, явцын болон үр дүнгийн талаарх мэдээллийг цуглуулан дүн шинжилгээ хийж, дүгнэлт, санал боловсруулав.

Туршилт – судалгааны дүгнэлтээс үзэхэд олон эерэг өөрчлөлт гарсныг дурдвал, танхимын сургалтын явцад суралцагчдын ухаалаг утасны хэрэглээ 88.6 хувь байсан бол төслийн үр дүнд суралцагчдын ухаалаг утасны хэрэглээ 42.9 хувь болтол буурч, Chromebook ашигласан хичээлийн оролцоо нэмэгдсэн байна. Мөн багш нарын цахим ур чадвар нэмэгдэж, суралцагчдын STEAM чадвар дээшилж, хайлтын системээр эрэл хайгуул хийх, асуудал шийдвэрлэх чадварт ахиц гарчээ. Chromebook болон Google хэрэгсэл хэрэглэх нь суралцагчдыг багаараа ажиллахад дэмжлэг болдог гэж багш нарын 71.4 хувь нь, суралцагчид ангийнхантайгаа харилцахад дэмжлэг болдог гэж 64.3 хувь нь тус тус санал нийлсэн байна.