ХҮҮХДИЙН АКАДЕМИК ҮГИЙН НӨӨЦИЙГ ТОГТООХ СУДАЛГАА НИЙСЛЭЛИЙН СУРГУУЛИУДАД ҮРГЭЛЖИЛЖ БАЙНА.

Боловсролын судалгааны үндэсний хүрээлэнгээс 2023 оноос эхлэн хэрэгжүүлж буй “Хүүхдийн академик үгийн нөөцийг тогтоон, түвшинд оноох” судалгааны баталгаажилтын мэдээлэл цуглуулах ажил нийслэлийн ерөнхий боловсролын сургуулиудад 2026 оны 2 дугаар сарын 3-наас эхлэн амжилттай үргэлжилж байна.

Судлаачид болон мэргэжлийн багш нар сургуулийн өмнөх болон бага боловсролын суралцагчдад зориулсан 6,000 гаруй академик үгийн жагсаалтыг урьдчилан боловсруулаад байна. Энэхүү жагсаалт нь хүүхдийн нас, танин мэдэхүйн онцлогт нийцэж байгаа эсэхийг шинжлэх ухааны үндэслэлтэй баталгаажуулснаар цаашид хүүхдийн хэлний бодит хэрэглээнд нийцсэн толь бичиг зохиох, сургалтын хөтөлбөр болон сурах бичгийн агуулгыг сайжруулах нөхцөл бүрдэх юм.

Судалгааг улсын хэмжээнд бүсчлэн явуулж байгаа бөгөөд түүврийн загварт нийт 6 аймаг, 8 дүүргийн 3,477 суралцагчийг хамруулахаар төлөвлөсөн. Үүнд:

• Сургуулийн өмнөх боловсрол: 6 аймаг, 6 сум, 8 дүүргийн 1,472 хүүхэд болон тэдний асран хамгаалагчдаас сорил, асуулгын аргаар мэдээлэл цуглуулсан.

• Бага боловсрол: Орон нутгийн (7 аймаг, 6 сум) 1,085 сурагчийг хамруулж дууссан бол, одоо нийслэлийн 8 дүүргийн 920 сурагчаас мэдээлэл цуглуулах ажил үргэлжилж байна.

Мэдээлэл цуглуулахдаа суралцагчийн сорил, багшийн үнэлгээ, эцэг эхийн асуулгын аргыг ашиглаж байгаа бөгөөд судалгааны багт БСҮХ-ийн эрдэм шинжилгээний ажилтнууд, МУБИС-ийн багш нар болон мэдээллийн технологийн мэргэжилтнүүд ажиллаж байна.

Судалгааны үр дүнд:

1. Хүүхдэд зориулсан тайлбар толь бичгийн үгийн санг хүүхдийн насны онцлогт тохирсон баталгаажсан академик үгсээр бүрдүүлсэн байна.

2. Хүүхдийн үгийн нөөцөд нөлөөлж буй хүчин зүйлсийг шинжлэх ухааны үндэслэлтэй тодорхойлсон байна.

3. Багш нарын үнэлгээнд үндэслэн толь бичигт орох үгсийн сангийн найдвартай байдлыг баталгаажуулсан байна.